ខណ្ឌដូនពេញ! ពិតជាខ្លាំងមែន មិនដឹងថាខ្នងអ្នកបើកល្បែងធំប៉ុនណាទេ បានជាហ៊ានបើកទីតាំងល្បែងអនឡាញបើកបង្អួតភ្នែកសមត្ថកិច្ច ខណៈពលរដ្ឋ ពឹងលើភូមិ ឃុំ មានសុវត្ថិភាព
ភ្នំពេញ÷ស្របពេលដែលរាជរដ្ឋាភិបាល ក៏ដូចជាប្រជាពលរដ្ឋទូទាំងប្រទេស កំពុងខ្វល់ខ្វាយដោះស្រាយបញ្ហាសង្គម និងសេដ្ឋកិច្ច ប៉ុន្តែនៅកណ្ដាលខណ្ឌដូនពេញវិញ បែរជាមាន "ឋានសួគ៌ម៉ាស៊ីនចាក់ភ្នាល់" បើកដំណើរការយ៉ាងរលូន ហាក់មិនខ្វល់ពីសេចក្ដីណែនាំ ឬច្បាប់ទម្លាប់អ្វីបន្តិចសោះឡើយ។
សកម្មភាពដ៏អស្ចារ្យនៅផ្ទះលេខ៤៩
យោងតាមការលើកឡើងពីប្រជាពលរដ្ឋក្នុងមូលដ្ឋាន ទីតាំងល្បែងស៊ីសងតាមប្រព័ន្ធអនឡាញមួយកន្លែង ដែលមានអាសយដ្ឋាននៅ
ផ្ទះលេខ៤៩ ផ្លូវលេខ៤៩ សង្កាត់ផ្សារថ្មីទី៣ ខណ្ឌដូនពេញ កំពុងតែទទួលភ្ញៀវយ៉ាងគគ្រឹកគគ្រេង។ មិនថា ក្មេង ចាស់ ប្រុស ស្រី គឺអាចចូលទៅកម្សាន្តបានដោយសេរី ហាក់បីដូចជាទីតាំងនេះមាន "អាវក្រោះ" ការពារមិនឱ្យអាជ្ញាធរមើលឃើញយ៉ាងពូកែស័ក្តិសិទ្ធិដូច្នោះដែរ។
តើសមត្ថកិច្ចមូលដ្ឋាន ស្រវាំងភ្នែក ឬក៏មើលរំលង ពលរដ្ឋបានដាក់ជាសំណួរថា ក្នុងខណៈដែលរាជរដ្ឋាភិបាលខំប្រឹងរឹតបន្តឹងបញ្ហាល្បែងស៊ីសង ដើម្បីកាត់បន្ថយអំពើចោរកម្ម និងអសន្តិសុខសង្គម តើហេតុអ្វីបានជាទីតាំងកណ្ដាលក្រុងមួយនេះ នៅតែអាចបើកទ្វារស្វាគមន៍ភ្ញៀវយ៉ាងរំភើយ?
ឬមួយទីតាំងនេះ មានមន្តអាគម បិទបាំងភ្នែក ឬមួយគោលការណ៍ ភូមិ ឃុំ សង្កាត់មានសុវត្ថិភាព គ្រាន់តែជាពាក្យស្លោកជាប់ និងជញ្ជាំ។
សំណូមពរដ៏ទទូចដល់ថ្នាក់ដឹកនាំ
តាមរយៈព័ត៌មាននេះ ប្រជាពលរដ្ឋសូមលើកម្រាមដៃដប់ សំណូមពរយ៉ាងទទូចដល់៖ឯកឧត្តម ឃួង ស្រេង អភិបាលរាជធានីភ្នំពេញ
ឯកឧត្តម ជួនណារិន អគ្គស្នងការរងនិងជាស្នងការនគរបាលរាជធានីភ្នំពេ
លោក ជា ខេម៉ា អភិបាលខណ្ឌដូនពេញ
លោក ទៀង ច័ន្ទ សា អធិការនគរបាលខណ្ឌ
មេត្តាជួយដកឃ្លាពីការងារមមាញឹក បញ្ជូនកម្លាំងចុះមក "អើតមើល" ទីតាំងខាងលើនេះផង។ កុំឱ្យពលរដ្ឋចេះតែមានមន្ទិលសង្ស័យថា សមត្ថកិច្ចខ្លាំងតែជាមួយអ្នកលក់ដូរតាមចិញ្ចើមថ្នល់ តែបែរជា "ទន់ជង្គង់" ជាមួយម្ចាស់ទីតាំងល្បែងស៊ីសងដែលបំផ្លាញសង្គមទៅវិញ។
ការបង្ក្រាបល្បែងស៊ីសង មិនត្រឹមតែជាការអនុវត្តច្បាប់ប៉ុណ្ណោះទេ ប៉ុន្តែវាគឺជាការផ្តល់ភាពកក់ក្តៅ និងសុវត្ថិភាពពិតប្រាកដដល់ប្រជាពលរដ្ឋ ស្របតាមអនុសាសន៍ដ៏ខ្ពង់ខ្ពស់របស់ប្រមុខរាជរដ្ឋាភិបាល។ យើងរង់ចាំមើលថា តើទីតាំងផ្ទះលេខ ៤៩ នេះ នឹងត្រូវ "អប់រំ" ឬ "បិទជាស្ថាពរ" ក្នុងពេលឆាប់ៗនេះ?។